plattdüütsch Niedersachsen klar Logo

Nedersassen – en Land, dat Neeis angeiht

Dat gifft en gode Tradition van Innovationen ut Nedersassen: De eerste Rekenmaschin mit all veer Grundrekenaarden (Leibniz), de eerste Motorflüggt mit Mann an Boord (Jatho), dat PAL-Klörenfernsehn (Bruch) un en hele Bült technologische Neeiheiden komen ut Nedersassen. Ok vandaag komen in de Bedrieven in Nedersassen elke Dag neje Ideen, Technologien un neje Produkten up.

Disse Mögelkheiden mutten wi stark maken, denn blot dör neje Produkten un Deensten könen de Bedrieven beter in de Wettbewarv bestahn un Arbeidsteden brengen. Man kummt för en beste Entwickeln van Neeiheiden in de Wirtschupp un de Wetenschupp um Nettwarken, de de Partners van beid Sieden tosamenbrengen, nich umto. Dör dat Innovationsnettwark Nedersassen is mit mehr as 200 Leden ut verscheden Rebetten as Kamers, Gemeenten, Verbannen, Transferinrichtens un Hoogscholen en Institution van Erfolg upsett worden. Alltied umto is bi dit Innovationsnettwark dat Innovationszentrum Nedersassen GmbH, en Inrichten van `t Land Nedersassen, de dat siet 2003 gifft.

Nedersassen hett in de verleden Jahren al völ Mögelkheiden för Vernejens upsett – so is de Kuntrei Brunswiek de Region van de meeste Förschen in Europa. Bi de Initiative Kompetenznetten Dütschland hett Nedersassen in de Ranglist van de Bunneslänner en Stee heel wied vörn.

Binnen de Grenzen van `t Land un ok daaröver weg word Nedersassen aver noch alltied as dat Land van Harz un Heid sehn. Dat sall sük ännern, daarum hett de Lannesregeren de Kampagne „Nedersassen - riek an Ideen“ up de Padd brocht. De sall daarto bidragen, dat Nedersassen in de Tokunft ok as en Land van Innovationen mit hoge technische Qualitäten sehn word.

na d‘ Anfang van disse Sied
Mobieltje Ansicht