plattdüütsch Niedersachsen klar Logo

Musik

Nedersassen is en Musikland mit en groten Tradition un togliek mit de Kraft, wat Neeis to schaffen. En Blick in de Musikhistoorje van dit Land wiest grote Namen: Michael Prätorius (1571-1619, Karkenmusiker, Komponist, Gelehrten) warkde in Wolfenbüttel, de Organist un Komponist Johann Sebastian Bach keem 1700 al mit 15 Jahr för dree Jahr för sien Utbilden na Lünebörg, Joseph Joachim (1831-1907, Geiger un Komponist) warkde in Hannover, Arp Schnittger (1648-1719) was een van de wichtigste Örgelboers in verleden Tieden.

Up de Rebetten Rock, Pop un Jazz wiest Nedersassen al siet mehr Jahren düdelk sien Egenheiden. Man ok de Musikwirtschaft tellt to dat Musikleven in Nedersassen: Grote Namen as de Klaveerboofirmas Schimmel un Grotrian-Steinweg in Brunswiek, de van ollersher bekannte Blockfleitenboer un Verlag Moeck in Celle, de bekannte Mikrophon- un Kopphörer-Hersteller Sennheiser un junge Musikproduktionsstudios un -firmen, de international Erfolg hebben, sünd Deel van en rieken un vöölsiedigen Musikkultur.

Nedersassen büddt butendeem en Bült Musikfestivals in verscheden Stilen un Veranstaltensförms in all Landesdelen - in de lesde Jahren is de Antahl up mehr as 100 Festivals stegen. Daarbi kann Nedersassen in enige Parten up en langen Festivaltradition torüggkieken: Dat ollste Festival för Barock-Musik weltwied sünd woll de Händel-Festspölen in Göttingen. Dat ollste Kamermusikfestival - de "Sömmerlike Musikdagen" - is elke Jahr in Hitzacker, dat ollste Festival för Neje Musik ut dat 20. Jahrhunnert gifft dat al siet ruugweg 50 Jahr in Brunswiek. Up anner Kant gifft dat ok in Nedersassen vööl neje Musikfestivals: de Dagen för Olle Musik in Georgsmarienhütte, dat Masala Weltmusik-Festival in Hannover, Klangaard in Ossenbrügge usw.

na d‘ Anfang van disse Sied
Mobieltje Ansicht