plattdüütsch Niedersachsen klar Logo

Land- un Ernährungswirtschaft

De Land- un Ernährungswirtschaft hett in Nedersassen van ollersher en groot Bedüden. Na de Autoboo steiht de Ernährungsindustrie an tweede Stee van all Wirtschaftsdelen. Hier arbeiden 80.000 Minsken, wenn man de lüttje Handwarksbedrieven mitrekent, verdenen hier sogaar 100.000 Minsken hör Inkomen. Dat Slachten un Fleeskverarbeiden steiht daarbi heel bovenan, daarna kummt dat Melkverarbeiden.

De Ernährungsindustrie kunn blot so machtig worden, umdat daar en starken Landwirtschaft achter steiht. Jede tweede Tuffel, de in Düütschland wasst, en Halv van all Geflögelfleesk, mehr as en Dardel van de Eier, en Dardel van dat Swienfleesk un ruugweg 25 % van de Zucker sünd ut Nedersassen. De Ernährungsindustrie un de Landwirtschaft sünd Partners mit glieke Rechten. Mitnanner bedenen se dat Verlangen van de Verbruker na gesund un goodkoop Eten un Drinken.

De Ernährungsindustrie in Nedersassen kann sük good anpassen, umdat de meeste Bedrieven ut de Middelstand komen. Siet Jahrteihnten könen de Unnernehmens ut Nedersassen bi de Produktion van Eten un Drinken best mithollen.

Nich eerst siet vandaag kickt de Verbruker ok up de Qualität van de Waar, un nich eerst siet de BSE-Schandaal is de Fraag wichtig, wo man de Qualität hollen un för de Produkten Sekerheid geven kann. De Hannel stellt hogere Anspröken an de Herstellers van Eten un Drinken wat Standardiseren, Qualität un Produktsekerheid angeiht. Neje Qualitätssystemen, de man weltwied insetten kunn, worden ok in Nedersassen entwickelt un mit Erfolg insett. Al nu hebben Bedrieven ut Nedersassen up de Markten van de neje EU-Lannen Foot faat; dat sücht na Towass ut för de tokomende Entwickeln.

De nedersassische Land- un Ernährungswirtschaft word politisch all minner regional un national, man mehr van de EU un all mehr sogaar international bestimmt. De starke nedersassische Bedrieven stellen nich blot de Anspröken van de Verbrukers up Qualität un Sekerheid van Eten un Drinken tofree, man ok de Anspröken an Umwelt-, Natur- un Derenschutz. Daarmit geiht de gode Entwickeln van uns Bedrieven ok in de tokomende Jahren so wieder as bit nu.

Combine harvester
na d‘ Anfang van disse Sied
Mobieltje Ansicht