plattdüütsch Niedersachsen klar Logo

Jo Weg an en düütschen Hoogschool

Vörutsettens för de Togang

  • För de Universitäten bruken Ji de allgemene Hoogschooltolaten (Abitur) of en anner Berechtigung för de Hoogschooltogang, de nettso vööl gellt.
  • För de Fackhoogscholen word de allgemene Fackhoogschooltolaten verlangt - de kriegen Ji meest, wenn Ji in Jo Land de allgemene Hoogschooltolaten kregen hebben.
  • För Kunst- un Musikhoogscholen könen Ji de Tolaten för 't Studium ok ohn Hoogschooltolaten kriegen, wenn Ji en besünner künstlerische Gaav hebben.

Ok enige Vörbildungen ut de Beruf (t. B. Meister) könen as Tolaten för en Studium an nedersassische Hoogscholen gellen.

Spraakkönen

Bevör Ji in Düütschland anfangen to studeren, mutten Ji de "Deutsche Sprachprüfung für den Hochschulzugang ausländischer Studienbewerber (DSH)" ofleggen. Daarvan sünd Ji freei, wenn Ji t. B.

  • dat groot of lüttje düütsche Spraakdiplom van 't Goethe-Institut hebben,
  • de Zentrale Oberstufenprüfung van 't Goethe-Institut schafft hebben,
  • dat Tüügnis van de Faststellungsprüfung schafft hebben (Prüfung, waar faststellt word, of butenlandse Studienbewarvers de Vörutsettens för en Studium an Hoogscholen in de Bundsrepublik Düütschland mitbrengen)
  • dat Spraakdiplom van de Konferenz van de Kultusministers Stufe II schafft hebben,
  • de Test Düütsch as Frömdspraak för butenlandske Studienbewarvers (TestDaF) schafft hebben (www.testdaf.de),
  • dat Abitur an en düütschen School in 't Butenland maakt hebben of
  • de US-advanced-Prüfung in dat Fack Düütsch schafft hebben.

Wo dat genau sitt mit de DSH un de Tolatensbedingungen up dat Rebett Spraak worden Ji over dat Akademische Butenlandsamt/Studentensekretariat van de Hoogschool in Nedersassen gewahr, de Ji Jo utsöcht hebben.

In Nedersassen word best Hoogdüütsch proot. Dat maakt Jo dat Düütschlehren lichter.

Wo man sük bewarven kann

Meest düürt dat ruugweg sess Maant van de eerste Anfraag bi de Hoogschool bit to d' Studienbegünn. Laat Jo daarum uptied de Unnerlagen för 't Bewarven (düütsch of engelsch) van 't Akademische Butenlandsamt/Studentensekretariat bi de van Jo utsöchte Hoogschool tostüren un stüürt Jo Unnerlagen daar so gau as 't geiht weer hen. De Adressen finnen Ji t. B. up de boven benöömte Internetsieden van de enkelde Hoogscholen. Vergeet nich, mit Jo Unnerlagen en Spraaknawies, dat Ji genoog Düütsch könen (kiek boven), to stüren.

Visum

Börgers ut de EU un ut en paar anner Staaten (Australien, Island, Israel, Japan, Kanada, Liechtenstein, Neeiseeland, Norwegen, Swiez un USA) bruken kien Visum. All annern mutten over de düütsche Butenlandsvertreden in hör Heimatland en Andrag up en Visum för 't Studeren stellen. Daarför mutten Ji de Tolaten för 't Studium an en düütschen Hoogschool of Studienkolleg vörleggen. Mit en Touristenvisum word dat nix!

na d‘ Anfang van disse Sied
Mobieltje Ansicht