plattdüütsch Niedersachsen klar Logo

Justiz in Nedersassen

In de nedersassisch Justiz warken mehr as 11.000 (ohn Vollzug) Mitarbeiders. Dat Justizministerium is as boverste Landesamt tostännig för all Gerichten, Staatsanwaltschuppen un Gefängnissen in Nedersassen. Butendeem warkt dat Justizministerium mit bi dat Planen van Gesetzen för dat Land, man ok för de Bund.

Bi de Gerichten warken ruugweg 1.900 Richters. De sünd in fiev verscheden Gerichtsrebetten togang (ördentlike Gericht, Arbeids-, Verwaltens-, Sozial-, Finanzgericht). Oordelen worden „in d’ Naam van 't Volk“ utsproken, d.h. de Richters sünd na dat Grundgesetz freei in hör Entscheden. Ruugweg 500 Staatsanwalten förschen tosamen mit de Polizei na, wenn dat en Henwies up en Verstööt tegen dat Gesetz gifft. De Staatsanwaltschuppen förschen na all Henwiesen, eendoon of dat för of tegen de Verdacht spreckt. Butendeem sünd de Staatsanwalten in Straafprozessen Vertreders van de Anklaag. Well tegen dat Gesetz verstött, kriggt en Geld- of Freeiheidsstraaf. De hoogste Straaf is en levenslange Freeiheidsstraaf. Wenn 15 Jahr daarvan vörbi sünd, word van Amts wegen kuntroleert, of de Haftstraaf noch langer düren mutt. In d’ Snee worden Minsken, de in Nedersassen to en levenslange Freeiheidsstraaf veroordeelt worden sünd, na 20 Jahr freeilaten (bundeswied in d’ Snee na 18 Jahr).

In de Justizanstalten in Nedersassen warken 3.900 Minsken, de in 14 Gefängnissen för ruugweg 6.500 Insitters tostännig sünd. Bevör de entlaten worden, mutt elkeen daarup vörbereidt worden, dat he in Freeiheid weer in de Gemeenschupp leven kann. Umdat man weet, „dat se mörgen weer uns Nahbers sünd“, sett de nedersassisch Justiz up en goden Mengsel tüschen Sekerheid för de Börgers un dat Weerupnehmen van de Gefangene in de Gemeenschupp.

De Justiz is mit dat Gesetzgeven (Legislative) un de Verwalten (Exekutive) de darde dragende Pieler van uns demokratische Staatsörnen. Grundlaag daarbi is dat Updelen van de Gewalten, d.h. elkeen van disse Pielers kann freei för sük entscheden.

na d‘ Anfang van disse Sied
Mobieltje Ansicht