plattdüütsch Niedersachsen klar Logo

Museums

Nedersassen hett en Bült verscheden un hoogweertige Museums. Dat Angebood geiht van de groot Sammlungen in de traditionsrieke Landesmuseums in Hannover, Brunswiek un Ollenbörg over de angesehn Kunstmuseums bit hen to de lüttje Museums mit hör besünner Sammlungen. In ruugweg 560 Inrichtens könen sük Laien un Facklüü en düdelk Bild maken van Leven un Arbeid in verleden Tieden un vandaag, van Natur un Technik un van olle un neje Kunst.

To de Glanzlüchten van de vöölsiedige Museums in Nedersassen hören buten annern dat ollste Museum van 't Land, dat Herzog Anton Ulrich-Museum in Brunswiek, dat al 1754 för de Börgers open maakt wurr, dat Sprengel Museum Hannover, dat Kunsthistoorje van 't 20. Jahrhunnert up hoogste Niveau wiest, un de Kunsthall in Emden, de ok ut en grote private Sammlung entstahn is. Enige Museums stellen enkelde Künstlers ut. Besünners to nömen sünd t. B. dat Felix-Nussbaum-Huus in Ossenbrügge un dat Horst-Janssen-Museum in Ollenbörg.

Buten de Museums beden ok Kunstverenen, daarvan gifft dat ruugweg 50 in heel Nedersassen, Galerien un anner Inrichtens en groot Antahl Utstellens to histoorsche un hütige Themen ut Kunst, Natur, Technik un vööl anner Rebetten van 't Leven - as stadige Utstellens of as besünner Utstellens.

na d‘ Anfang van disse Sied
Mobieltje Ansicht