plattdüütsch Niedersachsen klar Logo

Dat Land sett sük tegen Gewalt un Heiraden unner Dwang in Hülp för Froolü un Wichter

Över Gewalt tegen Froolü un Wichter is lang Tied nich open proot worden. Studien van de Wetenschupp wiesen, dat Gewalt in de Familie meesttieds tegen Froolü geiht. Blot fiev bit teihn Prozent van de Opfers sünd Mannlü. Intüschen könen Froolü, de misshannelt wurren, mit hör Kinner bi Froolü- un Wichterhusen un Beradenssteden unnerkomen. Fackkraften ut de Soziaalarbeid, Schandarms, Gerichten un kommunale Projekten arbeiden mit Erfolg tosamen. In Nedersassen gifft dat al in en Bült Kuntreien Steden van Beraden un to Ingriepen för de Opfers van Gewalt tohuus (BISS).

En besünner Aktionsplaan van `t Land, de tegen Gewalt tegen Froolü tohuus angeiht, brengt all Arbeid un Tosamenwarken bi ’t Land binanner. Dat Nedersassische Ministerium för Soziale Angelegenheiden, Froolü, Familie un Gesundheid stönt all disse Inrichtens un Hülpsangeboden mit en Bült Geldmiddels in elke Jahr.

„Well tosleit mutt gahn”: Mannlü, de tohauen, de hör Partnerin misshanneln, könen ut de gemeensaam Wohnen rutsett worden. Froolü, de Opfers sünd, un ok hör Kinner kriegen en verbetert Hülpsangebood. Mit en Rutsetten up Tied dör de Schandarms, waarför dat Opfer kien Andrag stellen, un de, de dat daan hett, ok nich anzeigen mutt, sall de Gewalt unnerbroken worden. So kriegen de Froolü to glieke Tied ok en Mögelkheid, mit Hülp van de Beradenssteden un Ingriepen hör Laag to verbetern.
Drohungen un Gewalt tegen Wichter un Froolü tohuus sünd kien lüttje Vergahn. Se mutten nettso ankeken worden as Verbrekens vör all Volk. De Schandarms, de för all Aarden van Gewalt tohuus good tolehrt sünd, helpen, dat de Opfers Schuul kriegen. All Polizeideenststeden, Beradenssteden för un Froolühusen geven Hülp.

Helptelefon Heiraden unner Dwang

Mit dat van de Lannesregeren 2007 inricht Helptelefon Heiraden unner Dwang gifft dat för Wichter un Froolü in Nedersassen, as ok för hör Fründinnen un Frünnen, Mesters, Mestersches, Mitarbeiders und Mitarbeidersches van Behörden of Beradenssteden lanneswied en Stee, waar se Hülp finnen. Röppt man de Nummer 0800/0667888 an, kriggt man, wenn man dat will, en eerste un persönelke Beraden up Dütsch, Türkisch, Kurdisch of Arabisch. Butendeem gifft dat daar ok Utkunft över Angeboden för Beradens in de enkelde Kuntreien. De Mitarbeiders un Mitarbeidersches hebben de Plicht, över dat wat d`r proot wurr, to swiegen.

Violence against women Bildrechten: Nds. Ministerium für Soziales, Frauen, Familie, Gesundheit und Integration
na d‘ Anfang van disse Sied
Mobieltje Ansicht