plattdüütsch Niedersachsen klar Logo

Internationale Kuntakten

Nedersassen liggt in dat Hart van Europa. De grote Verkehrspaden van Noorden na Süden un van Oosten na Westen lopen dör Hannover, de Lanneshauptstadt van Nedersassen. Nich blot wegen disse besünner Laag is Nedersassen en weltopen Land, för dat de Pleeg van internationale Kuntakten en groot Bedüden hett. Nedersassen will dat Beste ut de Mögelkheiden maken, de de Globaliseren beden deit. Daarum is dat Land open för en Tosamenwarken up de Rebetten van Wirtschupp, Wetenschupp un Kultur.

Daarna hett dat Land en hele Rieg van Partnerschuppen: In Polen mit de Woiwodschuppen Nederslesien un Grootpolen, in Frankriek mit de Haute Normandie, in Russland mit Perm un Tjumen, in China mit de Provinz Anhui, in Japan mit de Präfektur Tokushima, in Südafrika mit de Provinz Eastern Cape. Besünners eng is dat Tosamenwarken mit Nederland, langs de nedersassisch-nederlandse Grenz.

Nich blot disse Partnerkuntreien kriegen Besök, de Lannesregeren van Nedersassen pleegt hör Kuntakten in all Delen van uns Eer.

Disse Kuntakten, de dat Land överall up de Welt hett, gahn Hand in Hand mit dat, wat de „Global Players“ in Nedersassen doon: hier gifft dat t.B. de Dütsche Messe AG mit de Computermesse CeBIT un de Industrieschau Hannover Messe, beid sünd de gröttsten up de Welt. Ok de Volkswagen AG, de Continental AG un en hele Rieg anner Unnernehmens, de up de Markten van uns Eer engageert sünd, hebben hör Tohuus in Nedersassen.

Flag © Kai Michael Neuhold - fotolia.com Bildrechten: Kai Michael Neuhold - fotolia.com
na d‘ Anfang van disse Sied
Mobieltje Ansicht