plattdüütsch Niedersachsen klar Logo

Freeitied- un Beleevnisparks - Spaß för de hele Familie!

Kinner, jung Lüü un all, de sük jung föhlen, könen wat beleven: Nedersassens Beleevniswelten beden bi jede Weer beste Unnerhollen un Spaß för de hele Familie. Alleen in de Kuntrei Lünebörger Heid finnen Ji so vööl Freeitied- un Beleevnisparks binanner as nargends anners in Düütschland. To 'n Bispill De Heide-Park Aventürwelt & Resort: In de holten Achterbahn Colossos un de Achterbahn „Desert Race“, de d`r man so langsfegen, worden de Nerven van de Gasten fix kiddelt. Dicht bi de Heide-Park büddt de Snow Dome in Bispingen dat hele Jahr Winterspaaß. In de Hall, de 300 Meter lang is, kann man vull Swung skifahren, up `t Snowboard d’r langsnaihen of pläserelk Slee fahren.

De hoog Tahl van Wildparks un Derenparks in Nedersassen wisst, wo völklörig un groot de Derenwelt is. In de Weltvögelpark Walsrode, dat is de gröttste Vögelpark up uns Eer, kann man exotische Vögels bi ‘t Fladdern ankieken un hör Gieren un Galpen tolüstern. In de Serengetipark Hodenhagen geiht dat in d` Bus of mit `t egen Auto midden in Nedersassen up en upregend Safari. In dat Sea Life Aquarium Hannover daartegen duukt man in tropische Welten unner Water in. Deren van överall up de Welt kann man ok in de Beleevnis-Zoo Hannover bewunnern, de to de moiste Zoos van Europa hört.

Dütschlands eenmalige Experimenteerlandschupp för Naturwetenschupp un Technik – dat phaeno in Wulfsbörg – maakt Di Jank , wat uttofinnen. In dat Binnerste van disse futuristische Boo laden de interaktive Experimenteerstationen un Besökerlaboren daarto in, Geböhrnissen van de Naturwetenschupp uttoförschen. Futt tegenan in de AUTOSTADT Wulfsbörg kann de Besöker allens to dat Thema Mobilität / Bewegelkheid to weten kriegen. „Minschen, Autos un wat hör bewegen deit“ is dat Richtwoord van de Beleevniswelt van de Volkswagen-Konzern.

The Desert Race roller coaster at the Heide Park Adventure World Resort Bildrechten: TourismusMarketing Niedersachsen GmbH
na d‘ Anfang van disse Sied
Mobieltje Ansicht