plattdüütsch Niedersachsen klar Logo

Wirtschupps- un Messestee Nedersassen

Nedersassen steiht, wat de Grött anbelangt, an tweede Stee van all Bunneslänner, wat de Tahl van Minschen angeiht, is Nedersassen mit ruugweg 8 Millionen Inwohners an veerde Stee. Mit de Fall van de Müür in dat Jahr 1989 is Nedersassen in ’t Middent van Europa rückt. Dat good utbote Nett van Straten, Schienen un Waterpaden brengt gauste Verbinnens na de Markten in `t Binnen- un Butenland. Disse Unnerboo is ok düchtig belangriek för Waren, de dör heel Europa transporteert worden. De Seehavens van Nedersassen sünd de Poort na Amerika, de Feerne Oosten un de Rest van d` Welt. Mit de JadeWeserPort - de eenzige dütsche Deepwaterhaven – word in Wilhelmshaven nu nettakkraat en neje Dreihpunkt för Hannel un Wirtschupp upsett. Nedersassen is in Europa an vörderste Stee wat ’t Bewegen angeiht.

Hier worden de moiste Krüzfahrtschippen van de hele Welt boot, hier worden Delen för de gröttste Linienfleger, de A 380, produzeert, hier sitt mit Volkswagen de belangriekste Autohersteller in Europa. De Wirtschuppsrümte Wulfsbörg-Hannover-Brunswiek hört mit sien Fackweten to de gröttste Zentrums van Automobilwirtschupp in Europa. De Flughaven för Förschen Brunswiek/Wulfsbörg hört na Toulouse to de belangriekste Steden van Förschen up dat Rebett Verkehrsleittechnik un Lüchtsekerheid. In dat CFK-Valley Staad kummt dat dütsche Fackweten för köhlfäselverstarkde Kunststoffen binanner. Daarmit laten sük Flegers ut CFK boen, de lichter sünd, Drievmiddels sparen un minner Pleeg bruken.

Nedersassen is ok bi dat Thema „Energie“ de Nummer 1. Good en Dardel van dat Eerdölje, dat in Dütschland fördert word, un good 90 % van dat Eerdgas komen ut Nedersassen. Bi de Energieförms, de dat alltied weer neei gifft, so as Windenergie, man ok as Land van Biogas steiht Nedersassen in Dütschland an vörderste Stee. Disse Stee sall dör en konsequente Bruken van Windenergie in de Offshore-Rebett noch groter maakt worden.

De Messestee Hannover maakt dat för de Wirtschupp van Nedersassen mögelk, dat se de neeiste Technologien, Produkten un Systemlösens up Utstellens, de up de hele Welt bekennt sünd, liek vör de Huusdör anbeden kann. Nargens anners gifft dat en Messestee mit en so moderne un gode Unnerboo. De CeBIT un de HANNOVER MESSE, de beid Messen, de an meesten bekennt sünd, stahn för dat, wat Dütschland utteken deit un ok in Tokunft utteken sall: för en Riekdom an Ideen, för Innovationen, för dütsche Ingenieurskunst und en Vermarkten van dat, wat utfunnen un herstellt word.

na d‘ Anfang van disse Sied
Mobieltje Ansicht