„EldoRADo” Nedersassen – en Land för Radfahrers!

Stappt up Jo egen of en utlehnt Rad un denn kann 't losgahn up de good utboot Radwannerpaden. Radfahren is för vööl aktive Urlaubers de moiste Aard, de Besünnerheiden van de nedersassisch Kuntreien kennentolehren. Dat Land büddt mehr as 450 Touren an för Jung un Old, för Lüü, de wat Besünners söken, för Gruppen un de hele Familie. In 't Geheel trecken sük mehr as 13.000 Kilometer Radpaden as en Spinnennett over uns Bundsland. Egaal, of Ji Jo för Harz of för Heid, för Werser of Watt, för Moor of Meer entscheden – Ji lehren up en Radtour Land un Lüü besünners good kennen.

Bit na d’ Kimm kieken, krakende Möhlenraden, oll Slüsen un Straten tüschen wunnerbare Boomriegen an sük vörbitrecken laten. Up uns Radpaden könen Ji de Natur un Kultur in Ruh geneten, umdat man sük bi 't Radfahren up 't platte Land un in de Leegden van de Stromen nich leep stengeln mutt. Well sük mehr anstrengen will, kann sien Kraft un Utdüür utproberen bi 't Fahren up en Geländerad in d’ Harz, Werserbargland of Deister. Buten de bekennte düütsche Radtouren „Elvradpadd“ un „Werserradpadd“ gifft dat noch en Bült Touren to verscheden Themen, as t. B. de Nedersassisch Möhlenstraat of de Düütsche Fehnroute.

Mit de Dennstleisten „Bahn & Rad“ van de Düütsche Bahn fangt de Urlaub al mit de Anreis an. In mehr as 500 „Bedd & Rad“-Unnerkummsten, de egens för Radfahrers anboden worden un günstig sünd, finnen de Pedaalridders dat rechte Dack over de Kopp. Buten en seker Unnerstellmögelkheid för de Drahdesel, gifft dat haast overall för de Gasten ok de Mögelkheid, natte Kleer to drögen un en vullweertig Kraft-Fröhstück to eten. Wennehr gahn Ji mit `t Rad up ’t Padd?