plattdüütsch Niedersachsen klar Logo

Förschen

Up dat Rebett van de Förschen hett Nedersassen mit sien besünner Hoogscholen un ok mit de Inrichtens, de nich to de Hoogscholen hören, en hele Bült to beden. Dat so nömt „Dreekant van Förschen“ – Brunswiek, Göttingen, Hannover – is en van de belangriekste Kuntreien för Förschen un Entwickeln in Europa.

Mit de dütsche Exzellenzinitiative, de neje Projekten in de Förschen un besünner Institutionen stönt, hett de Universität Göttingen de (nich offizielle) Titel as een van de vörderste Universitäten up dat Rebett van de Förschen kregen. So nömte Exzellenzcluster sünd an de Universität Göttingen (Biomedizin), de Universität Hannover (Physik) und an de Medizinische Hoogschool Hannover (Regenerative Medizin) inricht worden. Gradueertenscholen gifft dat an de Universität Göttingen (Neurowetenschuppen) und de Medizinische Hoogschool Hannover (Biomedizin).

In ‘t Geheel gifft dat 13 Universitäten un 7 Hoogscholen in Nedersassen. Se hebben all hör egen Swaarpunkten in de Förschen entwickelt – van de Naturwetenschuppen un dat Ingenieurswesen bit hen to de Geisteswetenschuppen. Butendeem gifft dat in ‘t Land Nedersassen en grote Tahl van Inrichtens för Förschen, de nich to de Hoogscholen hören. Dat sünd t.B. de Instituten van de Max-Planck-Gesellschupp, de Fraunhofer-Gesellschupp, de Leibniz-Gemeenschupp, Zentren van de Helmholtz-Gemeenschupp un en Rieg van freje Lannesförschensinstituten.

In Nedersassen tekent sük de Förschen dör en grote Maat van verscheden Rebetten in de Wetenschupp un en besünners hoge Qualität ut. Dat wisst sük to ‘n Bispöl bi dat Inwarven van Drittmiddels, wat in de Institutionen best lopen deit. Sünner Tosamenwarken geiht dat nich. Ut disse Grund stönt de Lannesregeren besünners sükse Projekten, de Partners ut Universitäten un ut Instituten för Förschen, de nich to de Hoogscholen hören, binanner brengen un hör mitnanner arbeiden laten. Wegen disse Politik van Stön is Nedersassen vandaag bekennt för sien Expertise t.B. in Levenswetenschuppen un ok bi de Energieförms, de alltied weer nakomen. Butendeem sett sük dat Land al siet Jahren för dat Tosamenwarken van Wetenschupp un Industrie in, hier besünners bi de Fahrtügtechnik.

na d‘ Anfang van disse Sied
Mobieltje Ansicht