plattdüütsch Niedersachen klar Logo

Kultur un Histoorje - Nedersassen is Kult!

Utfinnen un sük wunnern, beleven un geneten - Nedersassen is Kult! Siet over 1.000 Jahr achterlaten Malers, Bildhauers, Ingenieuren, grote Heerschuppen un lüttje Lüü Sporen van hör Kultur tüschen Noordsee un Harz. Gaht up en besünner Reis dör Ruum un Tied - bildmoje Möhlens, spannende Museums, staatsche Slötten of de Boowarken van de Werserrenaissance wachten daarup, dat se entdeckt worden. De nedersassische Steden beden en antreckelke Vöölklörigheid bi hör kulturelle Veranstaltens: traditionelle Schützenfesten, Markten as in 't Middeloller, bunte Füürwarken of ewigsmoje Wiehnachtsmarkten vör olle Husen.

Snüüstern un entdecken, lehren un begriepen: Nedersassens Museums, Kunsthallen un Utstellungssteden sünd vull van Overraschungen. De Museums in Nedersassen sünd nettso verscheden as hör Besökers - mehr as 600 anerkennte Museums vertellen van de Histoorje un de Kultur in 't Land. Ok de UNESCO hett de Kulturlandschupp van Nedersassen völ in d` Reken: Dat frohere Erzbargwark Rammelsbarg; de wunnerbare olle Stadtkeern van Goslar, de frohromanische Kark St. Michael un ok de Dom in Hildesheim hören to dat UNESCO-Weltarv. Betekend för Nedersassen sünd ok de völe Möhlens, an de man up en Reis dör dat Land wiss vörbikummt. Ruugweg 800 Water- un 600 Windmöhlens gifft dat vandaag noch in Nedersassen - vööl daarvan sünd mit Leevde weer upklütert worden un stahn to ankieken open.

na d‘ Anfang van disse Sied
Mobieltje Ansicht