plattdüütsch Niedersachen klar Logo

Van d' Harz bit na Neeiharlingersiel - En Gedankenreis dör dat Land Nedersassen

Wenn Ji Jo in Nedersassen noch nich utkennen, koomt mit uns up en körten Gedankenreis dör dat Land. De Begünn kennen Ji villicht: De söven oostfreesche Eilannen Börkum, Juist, Nördernee, Baltrum, Langeoog, Spiekeroog un Wangerooge. Brede witte Stranden, Ebb un Flood, Dünen un mehr Sünnschien as enerwaars anners in 't Land.

Tegenover liggt Oostfreesland, dat Land achter de Diek, dat langer as elke anner Kuntrei in Nedersassen up egen Foten stahn hett. Seefahrerland un Schuulhook van de Liekedeler Störtebeker, mit Steden, de utsehn as in Holland, un mit de hoogste Teeverbruuk in de Bundsrepublik.

Na d' Süden daal liggt langs de hollandsche Grenz dat Eemsland, waar man noch vör 100 Jahr haast nich henkomen kunn: Dat baldadig groot Bourtanger Moor wurr eerst in 't Middent van dat 20. Jahrhunnert dröögleggt.

Daar tegenan hett sük dat Ollenbörger Münsterland van en arm Burenland to en europeesche Zentrum för Veehtucht entwickelt - in gode Nahberskupp mit Ossenbrügge, de Stadt in d' Teutoburger Wald, waar de Westfaalsche Free tostann keem.

Dat Werserbargland geiht van dat oll Fürstendoom Schaumbörg-Lippe over de Röttenfangerstadt Hameln bit na Hannoversch Münden. In Göttingen hebben de Bröörs Grimm de Sagen un Vertellsels langs de düütsche Märkenstroom upschreven.

Van Hexen hanneln de Vertellsels in d' Harz, de Bargen van Nedersassen, de mit hör Sülverminen Riekdoom brochen. Waar eens düütsche Kaisers en Kaiserpfalz booden, bekieken sük nu Touristen de Fackwarkhusen un de Töverwald.

Vandaag liggt de Wirtschaftskracht van Nedersassen in d' Noorden van de Harz. Hier liggen dicht binanner fiev groot Steden: Hildesheim mit sien Karken, de as Weltkulturarv bewahrt worden, dat noch jung Stahlzentrum Salzgitter, Hannover mit de grootste Messen van de Welt, Wolfsbörg mit de neje "Autostadt" van Volkswagen un daar midden tüschen Brunswiek, de Stadt, waar dat al siet 250 Jahr Hightech gifft.

Wieder na Noorden de Lünebörger Heid, de hör Naam van Lünebörg kreeg, en Stadt, de in 't Middeloller dör Solt riek wurr. De Heid is eerst vör 100 Jahr en Kuntrei to Verhalen worden. En lang Sett lagg se ofgelegen an de Grenz na d' DDR un is bit vandaag en Sandgegend, fredelk un vull mit eensaam Streken.

Bleihende Appelbomen trecken in 't Vörjahr en Barg Besökers an, na dat Oll Land achter de Dieken un vör de Dören van Hambörg. Daar fangt dat "Natte Dreekant" an: Dat platte Land tüschen de Elv- un Wersermündung, mit Mooren, de Fischereestadt Cuxhaven un de Künstlerkolonie Worpswede.

Over dat Bundsland Bremen, dat midden in Nedersassen liggt, geiht de Rundreis over de Werser torügg na de Universitätsstadt Ollenbörg. De Kuntrei hett de glieke Naam un treckt sük van dat Münsterland bit na Wilhelmshaven, de grootste Haven in 't Land. Genauer seggt: Bit na Wangerooge, dat sövente "oostfreesche Eiland", dat nie nich to Oostfreesland höört hett.

Cyclist in the Harz mountain region
na d‘ Anfang van disse Sied
Mobieltje Ansicht