plattdüütsch Niedersachsen klar Logo

En Land mit Wiedblick

Nedersassen hett vööl to beden: Buten Besünnerheiden in Kultur, Landschaft un Tradition bewiest sük dat tweedgrootste Bundsland as profitelke Stee för de Wirtschaft. De Volkswagen AG as grootste Autofabrik in Europa hett wied mehr as 50 Millionen Volkswagens boot. Dübbelt so vööl Arbeidssteden as in d' Snee van de Bundsrepublik hebben hier mit dat Auto to doon. Nettso stark is ok de Buurderee. En Agrarland is Nedersassen aver nich mehr. De Hannover Messe un de Computermesse CeBIT hebben ut de Kuntrei Hannover de belangriekste Messestee van de Welt maakt. Universitäten mit en lang Tradition in Brunswiek un Göttingen, de Medizinsche Hoogschool in Hannover un en Bült Steden buten de Universitäten, waar förscht word, wiesen de gode Tosamenarbeid tüschen Wetenschupp un Wirtschaft.

Vööl Minschen denken daar geern an torügg, dat se in Nedersassen up de Weltutstellen EXPO 2000 to Gast weren.

Dat Land is nich so dicht besiedelt un hett en besünner Landschaft tüschen Eems un Elv, de Bargen in de Harz un dat Hoogseeklima van de Noordsee. Naturschutz is en Verplichten: Mehr as 20 % van dat Land stahn as Naturparks unner Schuul, de Nationalpark Wattenmeer geiht over de hele Noordseeküst, de Nationalpark Harz treckt sük over de Landesgrenz bit na Sassen-Anhalt hen. In de Flusslandschaft Elbtalaue steiht de Levenswelt van all Planten un Deren unner Schuul. Daartüschen liggen en groot Antahl Mooren, eensame Heidlandschaften un wiede Mischwaldkuntreien.

Koomt mit up en Gedankenreis dör Nedersassen of beleevt Nedersassen in Biller!

Cow Bildrechten: Touristik GmbH Südliches Ostfriesland
na d‘ Anfang van disse Sied
Mobieltje Ansicht