plattdüütsch Niedersachen klar Logo

Ollerworden as Mögelkheid

En moderne Politik för ollerde Minschen – för en Gesellschupp van en lang Leven

Uns Gesellschupp wannelt sük van Grund up. De Tosamensetten van de Inwohners sall sük in de tokomend Jahren un Jahrteinden heel un dall ännern. Uns Gesellschupp word leep gau oller. Ollerde Minschen worden in de Gesellschupp van mörgen noch belangrieker as nu. Al vandaag is elke fievde Inwohner mehr as 60 Jahr old. Un in nich maal een Generation sall sük disse Andeel up bold 40 Prozent verdübbeln. Daarum bruken wi Tosamenhollen, Gerechtigheid un Verantwoorden tüschen de Generationen. Dat Land will up dat, wat Old un Jung an verscheden Könen un Bruken hebben, ingahn un en Mitnanner van Old un Jung Stön geven.

Nedersassen will de Generationen dichter binanner brengen. Daar helpen t. B. de Mehrgenerationenhusen bi. En Idee ut Nedersassen, de dat nu in heel Dütschland gifft.

En neje Politik för ollerde Minschen helpt, dat se, so lang as dat geiht, hör Leven sülvst in d` Hannen nehmen. Man disse Politik weet ok, dat ollerde Minschen mehr krank worden un pleegt worden mutten. Vörbugen is daarum för de Politik nettso belangriek as dat Bibehollen van de hoge Standards up dat Rebett van Gesundheid un Pleeg.

Ollerde Minschen worden in de Gesellschupp van en lang Leven bruukt as noch noit. Wi bruken hör Weten un hör Mitverantwoorden, man ok, dat se för dat, wat se geern harren, intreden. Wi willen, dat se beter deelhebben könen, so dat se hör Weten un Könen best in Ehrenamten, Politik un Wirtschuppsleven insetten könen.

Bispölen van nedersassische Generationen- un Seniorenpolitik

Seniorenservicebüros
Van de Stadtstaaten ofsehn, stönt Nedersassen as dat eerste grote Bunnesland Stapp för Stapp överall dat Upsetten van Seniorenservicebüros. Nu worden van dat Land de eerste Servicebüros inricht. Daar gifft dat en groot un good ofstimmt Angebood van Hülp, Beraden un Deenstleistens för ollerde Minschen.

Freeiwillig Jahr för ollerde Minschen
Bold nettso as bi dat Freeiwillig Soziaal Jahr för jung Lü, brengen ollerde Minschen hör Weten un Könen för tominnst een Jahr in, un dat an een of twee Dagen in de Week, in verscheden Initiativen un Projekten.

Nedersassenbüro Neei Wohnen in `t Oller
Dat Land Nedersassen stönt siet Januar 2008 de Upboo van en unofhängige Wohnberaden van de Steden un Landkreisen. Dat Büro sall tohoop mit de Kommunen daarto bidragen, neje Förms van Wohnen in `t Oller up de Padd to helpen.

Lannesanregen recht tosneden Produkten
Dat för heel Dütschland modellhafte Nettwark mit Partners ut Wirtschupp, Wetenschupp, Gewerkschuppen, Verbannen un Politik will recht tosneden Produkten un Deenstleistens för ollerde Minschen utmaken un vermarkten. Butendeem sall en neei Bild van `t Oller mit all sien Mögelkheiden un sien Weten röverbrocht worden. Nedersassen is ok Lidd in dat Nettwark Seniorenwirtschupp van de Europäische Regionen.

Senior citizens
na d‘ Anfang van disse Sied
Mobieltje Ansicht