plattdüütsch Niedersachen klar Logo

De Nedersassische Landdag

As wählte Vertreden van 't Volk is de Landdag dat boverste Verfatensorgan van 't Land. De Landdag beslutt de Landesgesetzen un de Landeshuushollen un wählt de Ministerpräsidentin of de Ministerpräsident. Butendeem warkt de Landdag mit bi dat Tosamenstellen van de Regeren un kuntrolleert de Landesregeren.

Wi leven in en mddelbaren Demokratie, waar de Minsken, de wi wählt hebben, uns vertreden. All Staatsgewalt geiht van 't Volk ut. Se word van 't Volk dör Wahlen un dör Ofstimmen, t. B. Volksentschedens, butendeem van de Verfatensorganen van 't Land dörsett: van de Stee för 't Gesetzgeven (Landdag), de Stee för dat Dörsetten (Landesregeren un de Amten daarunner) un de Stee för dat Rechtspreken (Staatsgerichtshoff un anner Gerichten). Manken disse Steden hett de Landdag en besünner Bedüden: He word as eenzigst direkt van 't Volk wählt.

De Landdag is dat Organ för 't Repräsenteren, umdat he dat hele Volk vertreddt. Togliek is he de Stee, waar de heel verscheden Menens un Interessen van de Börgersches un Börgers in Entschedens för dat Lenken van de Staat umsett worden, de as Recht gellen sölen. He is dat Wahlorgan, umdat sien Ofgeörnten de Leden van anner Staatorganen wählen (Landesregeren, Staatgerichtshoff, Landesrekenshoff, Datenschutzbeupdragte). Un he is dat Kuntrollorgan, umdat he up verscheden Maneren de Landesregeren un de hör Verwalten kuntrolleert.

na d‘ Anfang van disse Sied
Mobieltje Ansicht